କଦପା: ୩୧ ବର୍ଷୀୟ ପଟ୍ଟୁପୋଗୁଲା ପବନ କୁମାର। ପେସାରେ ଜଣେ ଇଞ୍ଜିନିୟର। କୋଭିଡ଼–୧୯ରସମୟରେ ସ୍ବେଚ୍ଛାକୃତ ଭାବେ ରକ୍ତଦାନ କରିବା ପାଇଁ ଲୋକଙ୍କୁ ଉତ୍ସାହିତ କରି ଚର୍ଚ୍ଚାରେ ରହିଛନ୍ତି ସେ। ‘ବ୍ଲଡ ୨ ଲାଇଭ’ ନାମକ ଏକ ସ୍ୱେଚ୍ଛାସେବୀ ସଂଗଠନର ପ୍ରତିଷ୍ଠାତା ପବନ କୁମାର। ଉକ୍ତ ସଂଗଠନ ୭୦୦ ୟୁନିଟ୍ ରକ୍ତ ସଂଗ୍ରହ କରିବାରେ ସଫଳ ହୋଇଥିବା ବେଳେ ଏହାକୁ ସରକାରୀ ଡାକ୍ତରଖାନା ଏବଂ ବ୍ଲଡ ବ୍ୟାଙ୍କକୁ ପ୍ରଦାନ କରିଛି।
ଇଞ୍ଜିନିୟରିଂ ଅଧ୍ୟୟନ କରିଥିବା ପବନଙ୍କ ଏଭଳି କାର୍ଯ୍ୟକଳାପ ପଛରେ ଏକ ଦୃଢ଼ କାରଣ ମଧ୍ୟ ରହିଛି। ୨୦୦୭ ମସିହାରେ ଯେତେବେଳେ ସେ ୧୮ ବର୍ଷର ହୋଇଥିଲେ ପବନଙ୍କ ମାତା ପାର୍ବତୀ ଅସୁସ୍ଥ ହୋଇପଡିଥିଲେ। ଡାକ୍ତରମାନେ ମେରୁଦଣ୍ଡରେ ଅସ୍ତ୍ରୋପଚାର ପାଇଁ ପରାମର୍ଶ ଦେବା ସହ ପରିବାର ସଦସ୍ୟଙ୍କୁ ଅସ୍ତ୍ରୋପଚାର ପାଇଁ ଆବଶ୍ୟକ ରକ୍ତ ବ୍ୟବସ୍ଥା କରିବାକୁ କହିଥିଲେ। ସେ ଏକ ଗରିବ ପରିବାରରୁ ଆସିଥିବା ହେତୁ ତାଙ୍କ ସମ୍ପର୍କୀୟମାନେ ରକ୍ତଦାନର ଅର୍ଥ ଜାଣି କ’ଣ ତାହା ନ ଥିଲେ।
ଫଳରେ କେହି ରକ୍ତଦାନ ପାଇଁ ଆଗକୁ ଆସି ନଥିଲେ। ତାଙ୍କ ମା’ଙ୍କୁ ବଞ୍ଚାଇବା ପାଇଁ ପବନ ରକ୍ତ ଦାନ କରିଥିଲେ ଏବଂ ଅସ୍ତ୍ରୋପଚାର ସଫଳ ହୋଇଥିଲା। ଯେତେବେଳେ ସେ ଇଞ୍ଜିନିୟରିଂ ପଢ଼ୁଥିଲେ ସେତେବେଳେ ସେ ସାଥୀ ଛାତ୍ରମାନଙ୍କୁ ଆବଶ୍ୟକ କରୁଥିବା ଲୋକଙ୍କ ପାଇଁ ରକ୍ତ ଦାନ କରିବାକୁ ଉତ୍ସାହିତ କରିଥିଲେ। ଘଟଣାଚକ୍ରରେ ପବନଙ୍କ ପତ୍ନୀ ଆଶା ଜ୍ୟୋତି ହୃଦ୍ରୋଗରେ ପୀଡିତ ହୋଇ ବିଜୟୱାଡାର ଏକ ଘରୋଇ ଡାକ୍ତରଖାନାରେ ଚିକିତ୍ସିତ ହେଲେ ଓ ତାଙ୍କର ହୃତପିଣ୍ଡରେ ପେସ୍ମେକର୍ ଲଗାଇ ଦିଆଯାଇଥିଲା।
ଏହାପରେ ସେ ତାଙ୍କ ଜୀବନର ମୂଳ ଲକ୍ଷ୍ୟ ଭାବରେ ରକ୍ତଦାନ ଅଭିଯାନ ଗ୍ରହଣ କରିବାକୁ ନିଷ୍ପତ୍ତି ନେଇଥିଲେ। ଗତ ୧୩ ବର୍ଷ ମଧ୍ୟରେ ହଜାର ହଜାର ସଚେତନତା କାର୍ଯ୍ୟକ୍ରମ ଆୟୋଜନ କରିଥିବା ଏବଂ ରକ୍ତଦାନ ଶିବିର ଆୟୋଜନ କରିଥିବା ପବନ ‘ଲକଡାଉନ୍’ ସମୟରେ ରକ୍ତ ଆବଶ୍ୟକ କରୁଥିବା ଲୋକଙ୍କ ଦୁଃଖ ଦ୍ୱାରା ପ୍ରଭାବିତ ହୋଇଥିଲେ। ଅନଲକ୍ ୧.୦ ପରେ ଚଳାଚଳ ଆରମ୍ଭ ହୋଇଥିବା ବେଳେ ଏହା ସଡ଼କ ଦୁର୍ଘଟଣା ସଂଖ୍ୟା ବୃଦ୍ଧି କରାଇଛି। ଏଥି ଯୋଗୁଁ ଡାକ୍ତରଖାନାଗୁଡ଼ିକରେ ରକ୍ତ ଆବଶ୍ୟକତା ବଢ଼ିଯାଇପାରେ ।
କୋଭିଡ–୧୯ର ଭୟ ଯୋଗୁଁ ଲୋକମାନେ ରକ୍ତ ଦାନ କରିବାକୁ ଅନିଚ୍ଛା ପ୍ରକାଶ କରୁଛନ୍ତି । ଯାହାଫଳରେ ରକ୍ତ ବ୍ୟାଙ୍କରେ ରକ୍ତ ସଂରକ୍ଷଣ ହ୍ରାସ ମଧ୍ୟ ପାଇଲା। ଏହା କେବଳ ଦୁର୍ଘଟଣା ପାଇଁ ନୁହେଁ, ବିଭିନ୍ନ ରୋଗ ପାଇଁ ବିଶେଷ କରି ହୃଦ୍ରୋଗ ଏବଂ ଅର୍ଥୋପେଡିକ୍ ଅସ୍ତ୍ରୋପଚାର କରୁଥିବା ବ୍ୟକ୍ତିମାନେ ମଧ୍ୟ ରକ୍ତ ଆବଶ୍ୟକ କରନ୍ତି। ବିଜୟୱାଡାର ନ୍ୟୁ ସିଟି ବ୍ଲଡ ବ୍ୟାଙ୍କର ଦାୟିତ୍ୱରେ ଥିବା ସୁରେଶ କୁମାର କହିଛନ୍ତି ଯେ ସେପ୍ଟେମ୍ବର ଦ୍ୱିତୀୟ ସପ୍ତାହରେ ପବନ ପ୍ରେରଣାଦାୟକ କାର୍ଯ୍ୟକ୍ରମ ଆୟୋଜନ କରିଥିଲେ। ପୱନ ରକ୍ତଦାନର ବିଭିନ୍ନ ଦିଗ ଏବଂ ଏହାର ଗୁରୁତ୍ୱ ଉପରେ ମଧ୍ୟ ଆଲୋଚନା କରିଥିଲେ।
ଏ ନେଇ ପବନ କହନ୍ତି, ‘ମୁଁ ରକ୍ତର ମହତ୍ତ୍ୱ ବୁଝିଛି ଏବଂ ଏକ ସ୍ୱେଚ୍ଛାସେବୀ ସଂଗଠନ ‘ବ୍ଲଡ୍ ୨ ଲାଇଭ୍’ ଆରମ୍ଭ କଲି। ଆଜି ପର୍ଯ୍ୟନ୍ତ ସଚେତନତା ସୃଷ୍ଟି କରି ୧୩ ଲକ୍ଷ ପାମ୍ପଲେଟ୍ ବଣ୍ଟନ କରିଛି। ମୁଁ ନିଜେ ୨୧ ଥର ରକ୍ତ ଦାନ କରିଛି।’ ପବନଙ୍କ ଏଭଳି ଉଦ୍ୟମ ତାଙ୍କୁ ରେଡ୍ କ୍ରସ୍ ପୁରସ୍କାର ଏବଂ ଏଆଇଏସଏଫ୍ ଆଚିଭର୍ ପୁରସ୍କାର ପ୍ରଦାନ କରାଯାଇଥିଲା।